محمد رمضان من ندوة تكريمه: الجميع يتحامل عليّ وعادل إمام عمل مدرسة المشاغبين وهو في سني

ياسمين حمادة 05 فبراير 2023 | 05:26 مساءً

تحدث الفنان محمد رمضان عن بداياته وعلاقته بنجوم الفن وذلك في ندوته اليوم الأحد، على هامش تكريمه بمهرجان الأقصر للسينما الأفريقية بالدورة الـ 12.

تصريحات محمد رمضان

قال الفنان محمد رمضان خلال الندوة إنه مازال في بداياته، والجميع يتحامل عليه ويضعوه تحت ضغط كبير، وما بينه وبين جمهوره هو العمل والكلمة الطيبة فقط.

واستكمل الفنان محمد رمضان قائلًا: «عادل إمام وهو في سني كان بيعمل مدرسة المشاغبين ودي نقطة لازم نلتفت ليها، أنا لسة مخلص جيش من سنة وحاسس إن في ضغط كبير عليا، وبيتقالي قوم اشتغل أنت لسة معملتش حاجة».

ندوة تكريم محمد رمضان

وتابع: «أنا لسة بس عايز أغسل وشي وأشرب قهوة وأبدأ أشتغل، فحاسس إن في تحامل شوية لسة بتعلم ومن سنتين كنت بشوف إن البطولة إن أنا لو اتحطيت في مشكلة لازم أكون واقف صلب، والنهاردة بعد سنتين عقلي نضج، وبقيت شايف إن البطولة إني أتلاشى المشاكل أصلُا، وأركز في شغلي».

وقال محمد رمضان أيضًا: «اللي بيني وبين جمهوري هو الشغل بس والكلمة الطيبة، لأن أنا كان لما حد يزعلني كنت برد بطريقة تزعل الناس مني، فأنا بتعلم والله وبوعد الناس إن كل سنة يحسوا إني بتغير للأحسن إن شاء الله».

محمد رمضان

محمد رمضان في الأقصر

وأضاف خلال ندوته في الأقصر: «سعيد بوجودي في مهرجان الأقصر، والفنان محمود حميدة ومجدي أحمد علي وهالة صدقي اتعلمت منهم الشغلانة وناس بيحبوا الفن حقيقي، والسيناريست سيد فؤاد عنده انتماء لشغله وأعرفه وأنا لسه بحبي وهو من الناس اللي مؤمنين بيا».

وقال أيضًا: «التمثيل غريزة، ولولا مسرح المدرسة عمري ما كنت هكتشف هذه الغريزة، وعمري ما كنت هعرف أعيش من غير ما أكون ممثل، ولقيت نفسي في المسرح.

محمد رمضان مهرجان الأقصر

وتابع محمد رمضان في تصريحاته الأخيرة: «كنت بسمع كلمة دايمًا سيب التمثيل لناسه، كنت بقول هما مين ناسه؟، كلمة ممثل معناها فرد بيمثل فئة وأنا ركبت قطر الصحافة، والممثل ده المفروض ركب أتوبيس وقعد على موتور ومر بالحاجات اللي الناس مرت بيها».

وعلى هامش تكريمه بمهرجان الأقصر، قال محمد رمضان أيضًا: «وعنده ذاكرة انفعالية لبني آدمين حقيقين في الشارع هما دول اللي بناخد مخزونا منهم وبنقدمه على الشاشة، والفنان محمود حميدة والمنتج محمد العدل كانوا متمسكين بيا، وفكرت جنب الفن في فكرة التسويق وإزاي أكسب الناس وكل شوية فئة جديدة وتنوع جديد».

وأشار إلى أن المسرح المدرسي أدى لظهور موهبته، وانطلاقته الحقيقية كانت من خلال مسرحية «قاعدين ليه»، ومنها توالت الأعمال مع المخرج يسرى نصر الله وآخرين، لافتًا إلى أنه عانى كثيرا في بدايته، وسانده عدد كبير من المخرجين منهم يسري نصر الله وشريف عرفة، وأشاد به الفنان الكبير روبرت دي نيرو خلال مقابلة جمعتهما من قبل.

محمد رمضان