#يوميات_خ_م يتصدر تويتر .. حكاية طبيب.. متجوز وخاطب وكاتب كتابه ومصاحب

تصدر هاشتاج #يوميات_خ_م موقع التواصل الاجتماعي تويتر، بعد اكتشاف واقعة غريبة بطلها طبيب في إحدى محافظات الدلتا، خدع زوجته، وخطب فتاة أخرى، وعقد قرانه على ثالثة.

وكشفت الواقعة الطبيبة المخدوعة «ر. ت»، عبر حسابها الشخصي على موقع التواصل الاجتماعي «فيس بوك»، عبر أكثر من منشور وقالت: «أنا مش بس مجروحة أو حزينة، أنا مدبوحة ووجعي بيزيد مش بيقل، وبحاول أقاوم الانهيار تمامًا»، «أنا كنت عايشة في عالم تاني وفي يوم وليلة ألاقي حد بيفوقني ويقولي كل اللي انتي فيه ده كدب!، متفاجئة بكل كلامكم ودعمكم ليا وإن كل الناس دي زعلانة ليا، ربنا يخليكم ليا ويكفيكم شر الناس»، لتختتم بطلب الدعاء: «ادعولي علشان الخبطة جامدة ومش حاسة بنفسي من وقتها».

وفي منشور آخر ذكرت تفاصيل الواقعة، وقالت: «البوست الأخير ليا هنا بخصوص الموضوع، وهاخد إجازة من هنا علشان الموضوع بقى صعب عليا وضاغطني بشكل لا يحتمل، جايز يكون اللي حواليا غضبانين علشاني مبسوطين بالتريند علشان يكون الموضوع عبرة وتوعية، وأنا المفروض أكون قوية وأنا هكون قوية وهعدي الأزمة بس محتاجة أرتاح وأبعد عن الضغط ده».

ووجهت حديثها للفتيات: «أنا مش عايزة فولورز ولا عايزة أطلع في برامج ولا أكتب تصريحات لجرايد، أنا مش عايزة غير إني أقول لكل بنت ما تغرقش بكل مشاعرها، وتاخد بالها من علامات كتير ما تبانش طبيعية، زي إنه مش عايز يعمل (engaged) ليكي على الفيسبوك رغم خطوبتكم الرسمية ويفضل سينجل».

«مهما كان الشخص جميل ومؤدب ومحترم وبيحبك وبيحترمك، ما تديش الأمان الكامل علشان ده اللي خلاني أقع فريسة سهلة لتصديق كل كدبة منه، بالعكس أنا لو كانت عندي شكوك مسبقة كانت الصدمة هتكون أهوّن».

وفى نصيحة لغيرها: «لازم تسألوا كويس عن الشخص وتعرفوا كل الحقايق مش بس اللي بيقولها عن نفسه، تقلقي لو اللي مرتبطة بيه كل شوية يقولك معرفش مين عايزة تقرب مني ومين بتجيبلي هدايا وفلانة بعتالي إيه حتى شوفي الاسكرين».

«أنا ما شوفتش أي حاجة وحشة بالعكس كان شخص داعم جدًا وواقف معايا وورايا في كل خطوة باخدها تخصني وتخص كاريري، أنا اتكتب كتابي وكنت فرحانة بكل تفاصيله ولسه الناس بتباركلي وأنام وأصحى على إن أبويا كشف ببطاقته في السجل المدني بعد ما وصله كلام وفعلًا لقي قسيمته»!

وتسرد الفتاة يوم اكتشاف الأمر، ومعرفة حقيقة زواجه من قبل: «تخيلوا كنت ماسكة القسيمة في إيدي وما شكتش فيه بالعكس قلت دي أكيد مؤامرة عليه، وفضل يومين من بعدها يكدب عليا ويسرح بيا وإنه ميعرفش طلعت إزاي، ووسط ما كل أهلي قاعدين يتهموه كنت واقفة بدافع عنه قدامهم، ويوصل لأخويا كل الأدلة من واحدة تالتة مرتبط بيها وبالفعل راح اتقدملها، ومكنتش قادرة أشوف ولا أسمع، وأخويا بنفسه يتأكد من جوازه وشقته وأنه عمل فرحهم كامل وكل ده محدش يعرف عنه حاجة لا أهله ولا أصحابه وأنا الوحيدة اللي علاقتي بيه معلنة».

و«كمية تفاصيل في الكدب علينا احنا التلاتة، مراته وأنا والبنت التالتة تخلي أي دماغ تشيط، واللي فضح الدنيا إني معروفة إلى حد ما بسبب شغل المايكاب فالبنت التالتة وصلتلي وبعتت لكل اخواتي ومن هنا انكشف كل حاجة، وجوازته اتعرفت بسبب خبر كتب كتابي اللي بابا كتبه عنده فاصحاب الشقة اللي متجوز فيها اصلا صحاب بابا وعرفوه واتأكدنا من السجل المدني وان القسيمة طالعة بعد شهر من خطوبتي».

وعن حالتها النفسية: «أنا اتاخدت غدر، وكل أحلامي اللي حلمتها معاه في ليلة واحدة بقت كدبة والمفروض أفوق منها، لسه مش مستوعبة إن الشخص اللي بحبه هو ده، لسه مش مستوعبة حاجة لأنه كان رائع في كل حاجة، أو يمكن النسخة اللي كانت معايا هي اللي كانت كده».

لتختتم: «ادعولي وخروجني من كل اللي بيحصل، أنا اللي ماسكة كل صحابي وأهلي أنهم ينزلوا صوره واسمه كامل لأني مش عايزة ده، كفاية أن الفكرة توصل وإن الكداب مسيره هيتكشف مهما خبّى، وأدعولي ألاقي السلام والأمان تاني بعد ما فقدت الثقة في كل حاجة».

هند صبري تتصدر «تريند» تويتر بسبب «كوميكس» مسلسل عايزة اتجوز

هاشتاج #مصر_تنجح_في_تعويم_السفينة الجانحة يتصدر تويتر