تامر الجيار: بتهاجم من 9 سنين عشان جاي من عالم مرفوض

تحدث تامر الجيار عن مخاوفه قبل دخول عالم التمثيل، والمشاركة في مسلسل بطل العالم مع الفنان عصام عمر والفنان فتحي عبدالوهاب.

قال تامر الجيار في لقائه مع الإعلامية نهال طايل ببرنامج تفاصيل المذاع على قناة صدى البلد 2: «كنت خايف لأني جاي من عالم مرفوض عالم التيك توك ده دايمًا عليه 100 حكاية و100 رواية فعايز أقولهم أبلكيشن التيك توك ده مش هنقدر نمنعه».

مخاوف تامر الجيار

وتابع: «بس هنقدر زي ما بنبين الجانب بنسبة 5% السلبي بتاع التريندات اللي الناس بتجري وراه عشان تبيع بيه الوحاشة، فيه نسبة كبيرة كويسة ليه مش بتبينوها للناس؟، فكل حد بييجي من العالم ده بيبقى مرفوض قبل ما يتكلم، تحسي إن هو في سجن عاوز ينطلق ويخش العالم بتاع التلفزيون العالم بتاع السينما مرفوض، أنت جاي منين؟ أنت تيك توك، يعني إيه أنا تيك توك؟ اديني فرصتي، اسألني، خليني أخش الأول.. مرفوض بالنسبة للناس صناع السينما».

كما كشف تفاصيل معاناته بسبب «التيك توك»، قائلًا: «أنا بتعرض لهجوم جامد بقالي 9 سنين، عايز أوري للناس أنا، من غير ما أقول أنا منين ولا أنا فين ولا أنا ابن مين.. عارفة كل رب أسرة يقولك عشان خاطر عيالي وعشان خاطر بيتي.. أقول له لأ عشان خاطر نفسك أنت الأول».

معاناة تامر الجيار بسبب التيك توك

وأضاف: «كل حلمي كان التمثيل، وفيه حاجات من اللي أنا عملتها مش فاهم أوي وكنت بلعب الأول، وكل واحد جديد في الأبلكيشن بتاع التيك توك أو فيسبوك عايز يعمل محتوى ففي البدايات لازم تلخبطي، لازم تعملي كمان حاجات عبيطة.. بقالي في التيك توك 10 سنين من أيام ما كان ميوزكلي.. بصارع».

واختتم تامر الجيار حديثه: «وعلى فكرة لما لقيتهم مش مدييني حقي في التمثيل غيرت.. رحت داخل في الطبخ، أنا مش الشيف شربيني ولا الشيف براك بس عندي حتة فنان، رحت جايب شوية أكل بسيط وعملت فيديو فحبوني، فقلت طيب خلاص المهم تحبوني وبلاش كمية النقد والإهانة والتنمر اللي بييجي وده متعب جدًا على أي حد عاوز يوصل عايز ينجح، الموضوع صعب جدًا إهانة ليك وإهانة لأهل بيتك».