تامر الجيار يتحدث عن مساندة نجوم الفن له وصلة قرابته بمحمد صبحي

تحدث تامر الجيار عن كواليس تعاونه مع الفنان فتحي عبدالوهاب في مسلسل بطل العالم، وردود الأفعال التي تلقاها من نجوم الفن من بينهم أحمد العوضي وأمير عيد.

قال تامر الجيار في لقائه مع الإعلامية نهال طايل ببرنامج تفاصيل، المذاع على قناة صدى البلد 2: «البدايات كنا بنعمل حاجات زي أكبر نجم دلوقتي، بس من غير ما أذكر أسماء عشان هم نجوم دلوقتي صف أول.. هو منزلش نجم هو بدأ من الصفر، ولو تابعتي التاريخ بتاعه من بدايته هتلاقيه مفيش خالص، لكن لما أخد أدوار واشتغل على نفسه وفرصة السنة دي وفرصة السنة دي بقى هو النجم فلان الفلاني، عشان كده بتشكر للنجم الكبير الأستاذ فتحي عبدالوهاب، وجه له تحية جدًا».

كواليس تامر الجيار مع فتحي عبدالوهاب

وتابع حديثه عن فتحي عبدالوهاب: «تمثيل مش هتكلم أنا أصغر من أني أقول على أستاذ فتحي عبدالوهاب، بس بتكلم في الإنسانية، شاف ولد في اللوكيشن طيب وراح إداني مساحة يا أستاذة، شايف النجم اللي بقولك كنت بتفرج عليه أنا ووالدتي الله يرحمها في ريا وسكينة وهو بيعمل وكيل النيابة مع أستاذة عبلة كامل.. فأنا هقف بقى جنبه؟ هتكلم معاه؟ له عندي هالة سبحان الله جوا قلبي، فلقيت النجم الجميل بيقول لي هات كرسي وتعالى، أنت منين يا جيار؟ قال لي أنا عارفك يا جيار أنا كنت بنزل عندكم السيدة، ولقيته بيقول لي إحنا هنعمل المشهد دلوقتي، الست دي مجنونة وعندها الزهايمر وإحنا عايزين نخش نجيب الفستان الأحمر، فعايزك تبقى معايا.. أنا غير مدرك ساعتها أنا فين، أنا إزاي فضل ربنا جه كده».

وأضاف تامر الجيار: «أنا بتعرض لهجوم جامد بقالي 9 سنين، عايز أوري للناس أنا، من غير ما أقول أنا منين ولا أنا فين ولا أنا ابن مين.. عارفة كل رب أسرة يقولك عشان خاطر عيالي وعشان خاطر بيتي.. أقول له لأ عشان خاطر نفسك أنت الأول.. كل حلمي كان التمثيل، وفيه حاجات من اللي أنا عملتها مش فاهم أوي وكنت بلعب الأول، وكل واحد جديد في الأبلكيشن بتاع التيك توك أو فيسبوك عايز يعمل محتوى ففي البدايات لازم تلخبطي، لازم تعملي كمان حاجات عبيطة».

واستكمل: «بقالي في التيك توك 10 سنين من أيام ما كان ميوزكلي.. بصارع... وعلى فكرة لما لقيتهم مش مدييني حقي في التمثيل غيرت.. رحت داخل في الطبخ، أنا مش الشيف شربيني ولا الشيف براك بس عندي حتة فنان، رحت جايب شوية أكل بسيط وعملت فيديو فحبوني، فقلت طيب خلاص المهم تحبوني وبلاش كمية النقد والإهانة والتنمر اللي بييجي وده متعب جدًا على أي حد عاوز يوصل عايز ينجح، الموضوع صعب جدًا إهانة ليك وإهانة لأهل بيتك».

دعم النجوم لتامر الجيار

وعن النجوم الذين دعموه، علق قائلًا: «الفنان أمير عيد.. شوفي لما يكون نجم وينزل لتيك توكر بسيط بس عشان شاف إن فيه إنسان هنا موجوع وجع جامد، فيدخل يكلمني في الخاص ويقولي: يا جيار أنا من متابعينك أنا بحبك، كمل واستمر أوعى حد ييأسك.. الكلمة دي كانت كبيرة جدًا وأنا في عز ضعفي، ويقول لي عشان بحبك كمان هعملك متابعة مع إني مبعملش متابعات لحد فهو المتابع الوحيد عندي، وأنا المتابع الوحيد عنده».

وتابع تامر الجيار: «بعدها يدخل لي النجم الجميل أستاذ وليد فواز ويقول: تامر الجيار ده سندال، ولو جه في ملعبنا أنا نفسي ييجي.. ده قبل ما أدخل المجال.. يدخل أستاذ عمرو يوسف يقول: الجيار ممثل وأتوقعله في رمضان يعمل حاجة.. أستاذ محمد ممدوح ياخد الجمل بتاعتي ويقولها في إعلان فكل ده أداني دفعة وأستاذ أحمد العوضي بحبه جدًا وشرفت إني قعدت مع أستاذ جمال العدل، ورُحت عملت حلقة الـ 5 والـ 10 في العدل ديجيتال تبع العدل جروب، فكلموني قالولي أستاذ جمال العدل عايز يشوفك بعدما شاف الحلقة بتاعتك.. رحت وأنا بترعش، هو صانع نجوم ومثقف جدًا، دخلت فريق العمل عنده حاببنا وبيقولوا له ده كويس وبيفن.. فدخلت قلت له: يا أستاذ إذا حضر الماء بطل التيمم، قلت له فيه مشهد للأستاذ عبدالرحمن الشرقاوي من مسرحية (الحسين شهيد)، فقال لي: أنت عارف مين اللي قال ده؟ الأستاذ محمود ياسين، نور الشريف، عبدالله غيث، كرم مطاوع.. أستاذ جمال لف بالكرسي فاكرني مكسوف لكن أنا بكون شخص تاني وقت التمثيل».

واستكمل تفاصيل لقائه مع جمال العدل، قائلًا: «لما خلصت قال لي: يا ابني ده أنت عندك شخصية، مكنش مصدق.. نزلت من عنده وأنا طاير حد من صناع النجوم بيشيد بتيك توكر بسيط، بعدها بسنة كنت ماضي بطل العالم».

وقال أيضًا: «النجوم الكبار منهم أستاذ فتحي عبدالوهاب نزل عنده يقول: الجيار أخد المسلسل في حتة تانية.. أستاذة جيهان الشماشرجي نزلت بوست من حوالي 3 أيام تقول: هو ده الجارد اللي كان لازم أختاره من البداية وعصام عمر علق لها قال خليه يكمل معاكي.. أوعى تستقل بأي مهنة شريفة أنت بتعملها، ممكن من خلالها تروح في حتة تانية.. وده اللي عمل معايا (البتنجان أخد البرجر في حتة تانية)، لدرجة شيف مصري في أمريكا كلمني من المطعم بتاعه وقال لي أنا بستأذنك اعتمد الساندوتش البتنجان على البرجر في المنيو».

علاقة تامر الجيار بالفنان محمد صبحي

وعن طموحه وموقفه من التريند، قال: «أنا مش بتاع تريند ورفضت الظهور مع البلوجر إسلام فوزي، أنا عايز أقف قدام النجم أحمد العوضي والنجوم الكبار.. ده اللي ناقصني.. الناس بتقول لي أنت اتغريت من 4 سنين بس بييجي عليكي وقت مينفعش بعدما أخدتي خطوة تنزليها».

وكشف علاقته بالفنان محمد صبحي قائلًا: «بتشرف إن ابن عمتي الأستاذ محمد صبحي ومجدي صبحي وشريف صبحي.. أنا من عائلة فنية بس عمري ما قلت ده، والفن مش واسطة وطبعًا متربي على فن الأستاذ محمد صبحي في (ونيس) القيم والمبادئ، وإزاي الفن رسالة، وإزاي يطلع ضحك من غير إفيهات، موقف يخليكي تشغلي عقلك فتضحكي».