تامر الجيار يكشف شرطه قبل المشاركة في مسلسل بطل العالم.. ما علاقة أشرف زكي؟

تحدث تامر الجيار عن تفاصيل مشاركته في مسلسل بطل العالم، ومخاوفه قبل ظهوره كممثل، بالإضافة إلى موقفه من الفنان أشرف زكي نقيب المهن التمثيلية.

قال تامر الجيار في لقائه مع الإعلامية نهال طايل ببرنامج تفاصيل، المذاع على قناة صدى البلد 2: «أنا متشرف إني موجود معاكي في حلقة، وأنا كنت بتمنى في يوم من الأيام أتقابل معاكي وأقدر أوصلك، فبفضل ربنا النهاردة أنا طالع معاكي ده تكريم».

تفاصيل مشاركة تامر الجيار في مسلسل بطل العالم

وتابع: «أنا مبسوط جداً واليومين دول يعني حصل لي حالة كدة مع الناس في الشارع، يعني الواقع اللي أنا عايشه، كرم ربنا عليا كبير أوي من مسلسل بطل العالم، كل ما أمشي في مكان كل ما أروح حتة كأني أنا بطل المسلسل، لو لاحظتي كل اللي عملته في المسلسل حوالي 5 مشاهد لكن تحسي كرم ربنا عليا إن أنا مؤثر حتى لو مش موجود في المشهد».

واستكمل تامر الجيار: «كنت خايف لأني جاي من عالم مرفوض عالم التيك توك ده دايمًا عليه 100 حكاية و100 رواية فعايز أقولهم أبلكيشن التيك توك ده مش هنقدر نمنعه بس هنقدر زي ما بنبين الجانب بنسبة 5% السلبي بتاع التريندات اللي الناس بتجري وراه عشان تبيع بيه الوحاشة، فيه نسبة كبيرة كويسة ليه مش بتبينوها للناس؟».

وأضاف: «فكل حد بييجي من العالم ده بيبقى مرفوض قبل ما يتكلم، تحسي إن هو في سجن عاوز ينطلق ويخش العالم بتاع التلفزيون العالم بتاع السينما مرفوض، أنت جاي منين؟ أنت تيك توك، يعني إيه أنا تيك توك؟ اديني فرصتي، اسألني، خليني أخش الأول.. مرفوض بالنسبة للناس صناع السينما».

شرط تامر الجيار قبل التمثيل

كما وجه رسالة للفنان أشرف زكي نقيب المهن التمثيلية، قائلًا: «بوجه له التحية إنه قدر يفلتر الناس، أنا لما جيت أمضي مسلسل بطل العالم قلت لهم أنا عندي شرط، فالناس اتفاجئت: 'أنت مين؟' فقلت لهم حقكم عليا اسمعوني، أنا مش عايز أخش مع الأستاذ أشرف زكي في صدام، ردوا عليا رد خلاني فرحان أوي، قالوا لي: 'أنت مالك يا جيار بالناس في التيك توك؟ أنت ملكش علاقة بالناس دي، أنت راجل في حالك، قلتلهم هاتوا العقد ومضيت على طول، أحب اللي يقدرني أوي يبقى شايفني زي ما أنا شايفه».

وقال تامر الجيار أيضًا: «أنا من منطقة شعبية من السيدة زينب وأتشرف، وقاعد دلوقتي في منطقة شعبية تانية اسمها العمرانية، شاب شغال في مكتب قال لي فيه كاستينج ممكن تيجي؟ قلت له يا ريت، خدني ورُحت المكتب ومن أول ما دخلت مش واحد عادي، يعني بفضل ربنا الناس هناك بتحبني اللي هما رايحين يعملوا كاست».

واختتم: «أول مشهد صورته مشهد الكاميرات مع الجميلة القمر جيهان الشماشرجي، مكنتش عارف مين اللي هيقف معايا أو مين اللي هتمثل معايا، أنا بعمل اللي هما قالولي عليه».