المخرج محمد سامي عن انفعاله أثناء التصوير: المشاكل بتيجي من أنصاف الفنانين

ياسمين حمادة 22 ابريل 2023 | 02:00 مساءً

تحدث المخرج محمد سامي عن تعاونه مع الفنانة هالة صدقي في مسلسل جعفر العمدة قائلًا: «أستاذتي الموهوبة الخلوقة اللي كانت لمانا كلنا في حضنها».

محمد سامي وهالة صدقي

قال محمد سامي في تصريحات تلفزيونية إن الفنانة هالة صدقي هي العمود الفقري لمسلسل جعفر العمدة، مضيفًا: «كانت معانا خبرة وأخلاق وذوق، وبشكرها إنها يوم ما قلتلها تعمل دور أم لناس كبيرة سنًا وافقت وقالت أنا ممثلة».

واستكمل مخرج مسلسل جعفر العمدة قائلًا: «هي ست جميلة وخفيفة الظل ويا بختي إن يتحط في تاريخي إني اشتغلت معاها، ومن حق الممثلين أصحاب القدرات دي إنهم يتعاملوا مع ناس تقدر تطلع القدرات دي منهم».

محمد سامي ومحمد رمضان

وفيما يخص تعاونه مع الفنان محمد رمضان، علق قائلًا: «في بيني وبين رمضان كيميا كبيرة، ودايمًا بنشوف الأمور زي بعض وبنسمع الكلام بطريقة واحدة، وده توافق ربنا بيخلقه نقدر نقول إن الموجة بتاعتي أنا وهو ظابطة زيادة عن اللزوم.. وساعات يحصل إني أكون رايح أقوله على ملحوظة، ألاقيه هو جاي يقول نفس الكلام».

وقال المخرج محمد سامي أيضًا: «ودايمًا بقوله أقوى اتنين في الوطن العربي في الوسط الفني هما أمي وأمك، لأن دعوتهم مع بعض بتؤدي لأشياء جميلة».

تصريحات المخرج محمد سامي

علق أيضًا على حقيقة خلافاته مع بعض الفنانين وانفعاله أثناء التصوير، قائلًا: «لما بتعصب على ممثل بيبقى يا إما هو بليد، أو مواعيده مش مظبوطة، أو مش بيذاكر ولا بيحفظ، وده طبعًا بيعطل زمايله.. هو كده هيفشل ويفشلنا معاه، ويبقى ممثل جاي متأخر ومش مركز ويسلب حقوقنا كلنا».

واستكمل: «وبتخانق معاه مهما كان مين ونجوميته قد إيه لأن النجوم الحقيقيين أصلًا محترمين، وعمري ما اشتغلت مع نجم كبير ومكنش محترم، دايمًا المشاكل بتيجي من أنصاف الفنانين.. هما اللي بييجي من وراهم مشاكل، بيبقى عايز طول الوقت يقول أنا نجم».

واختتم المخرج محمد سامي قائلًا: «فمش بيفكر في الشغل نفسه، ونجم زي محمد رمضان وأحمد السقا دول ناس تعلم جيدًا إنهم نجوم وناجحين، فبيركزوا في شغلهم والنجوم دول أول ناس بتيجي في ميعادها، وأكتر ناس مذاكرين وعندهم حرص على نجاح المشروع، زي الفنانين عادل إمام، والراحل محمود عبد العزيز، وأحمد عز، فالمشاكل بتيجي من الناس اللي بتبقى فاكرة إنهم نجوم وبيحاول يثبت ده برغم إن دوره مش هيأثر على بيع العمل بدولار واحد حتى».

بنات محمد سامي

كما تحدث محمد سامي عن بناته قائلًا: «بناتي الاتنين معلمني الأدب، وأكاد أكون أكتر أب شخصيته ضعيفة أمام ولاده، وحشري في حياتهم عشان حابب أكون ملم بكل تفاصيلهم، وأنا تحت جزمة أمي وأبويا هما حياتي، ولما بتجيلي مشكلة مش بعيط غير في حضن أمي، هي مصدر قوتي وأول حد صدق فيا».

وقال عن مي عمر: «أول حاجة لفت نظري في مي هو جمالها وعندها حياء، ومعندهاش طباع معينة وحشة في ستات، زي إنها مش حشرية ومش بتغير على كل حاجة، بتغير بس من غير ما تهزق نفسها وتزعل كل شوية، وهي عارفة إن كل الفنانات اللي بصور معاهم هما إخواتي وصحابي، وآخر عملين بينا هي اشتغلتهم بعد ما اتحايلت عليها».